Amira - Rosa (2004)

 

Amira - Rosa (2004)

 

 اميرة البوسنة

 

من اجمل الاصوات النسائية اللي سمعتها في حياتي, "اميرة ميدونجاناين" في سراجافو من البوسنة و الهرسك.

اظهرت ولعها الشديد بالفولكلور البوسني او التراث الشرق اوروبي "سفدالينكا" المتأثرة مباشرة بالموسيقي العثمانية. فالبوم "روزا" عبارة عن اعادة احياء لاغاني تراثية و شعبية من بلادها اللي كانت لسة طالعة من حرب في التسعينات, خلتها عايزة تعيد تقديمه لكن بالوصفة اللي تناسب جيلها و امكانيات صوتها, حيث من المعروف ان الموسيقي التراثية البلقانية او السفدا زيها زي ثقافات كتيرة، كثيفة من حيث استخدام الالات و ايقاع سريع راقص لانها كانت بتستخدم في الافراح و المناسبات.

لكن الالبوم جه هادي و هو ده اللي احنا محتاجينه! صراحة الالبوم مش محتاج كثافة في الinstrumentation من كتر جمال صوتها. مثلا "jutros mi ja ruza" عكس النسخة التقليدية, اميرة بتعتمد علي جيتار مصاحب يبرز قوة صوتها.
توليفة من الات غربية (جيتار, بيانو..) شرقية و محلية (الاكورديون, الناي و الكمان و البزق..) و عناصر ambient و الكترونية علي استحياء في mita bekrija و distorted guitar في bogata sam imam svega من فرقة "mostar sevda reunion" اللي اداها الفرصة لاول مرة في اغنية "mujo đogu po mejdanu voda" و لفتت الانتباه فقررت تبتدي مشوارها الفني بالتحفة دي مع نفس الفرقة و نجح نجاح كبير.

جمال صوتها خلي عندي شغف اعرف المزة البوسنية عايزة تقول ايه ؟! لكن لقيت الكلام شعبي جدا زي التراث المصري الشعبي عن الهجر و الحب.
في اغنية "jutros mi ja ruza" او "في بستان الزهور"

مختبئة في بستان الزهور
جلست البكر الجميلة
تقطف الازهار العبقة
منتظرة حبيبها, تنهدت:

"عسي ظلام الليل ان يدمرك"
"يا من حطمت قلبي"

"عسي دموعي ان تدمرك"
" يا من سرقت شبابي"

"لما قبلتني, "
"ثم هجرتني ؟"
https://www.youtube.com/watch?v=hicjCTQcnlo

و اجمل اغنية في الالبوم zajidi zajidi في الاغنية المقدونية بتعاتب حبيبها عشان اتأخر عليها و هي مستنية قدمه علي الباب بكلمات و تيمة تشبه اغنية محمد رشدي من ليلة ما جاني الغالي و يما القمر عالباب لفايزة احمد.
https://www.youtube.com/watch?v=jDYVN_Yg7BA

اغاني فلكلورية بتعبر عن المجتمعات المحافظة اللي زيه. امها اللي عايزة تجوزها واحد ابهة بس هي بتحب واد معصعص اسمه علي و حاجات كدة و بتختم الالبوم بامنية انها تبقي طير عشان تحلق فوق البوسنة كلها.

الالبوم كله حرفيا متزهقش منه اظن انه بداية رائعة لاي حد مهتم بالموسيقي البلقانية, الشرق اوروبية, حتي التركية او عايز يسمع تجربة مختلفة, خصوصا انها تعتبر مش غريبة علي ودن المستمع المصري.

٨/١٠
Amira - Rosa
من الموسيقي التراثية البلقانية
2004
اسمع : https://www.youtube.com/playlist?list=PLBs6Y813UWtlmBXn3v6HRl96Y3jhptLOz