Natacha Atlas - Gedida (1999)

 

 

Natacha Atlas - Gedida (1999)

ناتاشا اطلس - جديدة (1999) 

 

 بلجيكية بهوي مصري
"ناتاشا اطلس" في رحلتها للبحث عن جذورها عملت 9 البومات من اجمل و انجح تجارب المزج الكثيفة بين الموسيقي الشرقية و الغربي اللي سمعتها علي الاطلاق, مزج الstrings و الالات الشرقية بالdrum n'bass و الاليكترونيك.

اتولدت لاب بلجيكي من اصول مصرية يهودية في الحي المغربي في بروكسل اتعرفت هناك علي الموسيقي الشمال افريقية بما فيهم الشعبي و الطرب المصري. جو التنوع الثقافي خلاها تتعلم الفرنسية -اللغة الرسمية-, الانجليزية, الاسبانية و العربية. في السبعينيات انتقلت لبريطانيا بعد انفصال والداها.انضمت لفرقة ترانسجلوبل أندرجراوند لكن احساساها بالغربة في المجتمع الإنجليزي خلاها تقرر الانفصال عنهم وتنتقل لليونان و تركيا في عمر 17 و تشتغل راقصة شرقية بعد كدة بدأت الصولو كارير بتاعها بالبوم diaspora.

البوم "جديدة" بيسيبك في حالة ذهول و استغراب بانطباع إيجابي, لانه مش مجرد البوم عايز يدي شعور الغرابة و الexoticism و الجو الصحراوي للمستمع الغربي, لكن بيدل ان اللي عامله مذاكر و عارف الموسيقي المصرية كويس خصوصا المشهد السبعيناتي من حيث الكيبورد و الجيتار في "بحلم". افتخار ناتاشا بلغتها العربية و اصرارها انها تغني بيها رغم كسرها، خلاها تصدر الالبوم كله بالمصري ماعدا "Mon Amie la rose" كانت بالفرنسية و المصرية و اللي نجحت في اوروبا عكس الاغاني المصرية, استغلال الاوتار او الموسيقي الاوركسترالية و الالات التراثية الشرقية زي (الناي و القانون و المزمار الصعيدي...) في "عقبة" و "مستنيك" و مزجها بالالكترونيك لتأليف الحان شرقية مش مجرد تطعيمها في الحان غربية و catchy خلاص. يحسسك انه البوم لنجاة بس لخواجاية جاية زيارة معبد ابو سمبل.

زي ما تطرق الالبوم لمواضيع سياسية باسلوب الهيبهوب المشابه لa tripe called quest في "بسطت". و الحروب بسبب طبيعة اواخر التسعينات و الانتفاضة الفلسطينية في "كفاية". لكن و الاهم عبرت عن ادمية المواطن العربي اللي مش كل همه يقضي علي الكيان الصهيوني، لكن برضه عايز ينبسط و يحلم و ينيك.

من اجمل الاغاني غناها لفارس احلامها في "بحلم".

و بيرجع بيا تاني
علشان التقي بزماني
علي وعد انه هييجي تاني
و يصحيني في احلامي
https://www.youtube.com/watch?v=-Q73pe7uNiY

بتبعت رسالة حب للوطن العربي في "إزاي" بالاوتار و السينث لحد ما تسيبك مع مفاتيح البيانو في حالة سلام داخلي.

إزاي اوصفلك حبنا إزاي اوصفلك حبنا
الحب ده بحر الحياة الحب ده بحر الحياة

تاني تاني تاني بشوف في عينيك اماني
و يعود الحلم دايما في ابهي صورة تاني

نلمس بشرة جلدنا و لا يفهم ايه لون الخدود
و لا يعرف من فين اصلنا من ادم كلنا مولود

https://www.youtube.com/watch?v=2HwW6folK3U

قوليلي انتي إزاي جبتي الكلمات دي؟!

مفيش اغنية هيجتني بالعربي بعد ايام الميلودي غير "مهلبية".
اهات ناتاشا علي الطبلة و البايس الغربي في ايحاءات جنسية صريحة.

اه! اه! اه! اه!
عايز مني ايه ؟! قلي انت ايه؟!
وجعت راسي انت! غلبت راسي انت!
يا مغلبني يا محيرني !

انت تروح و تيجي و تروح و تيجي!
و تقلي انت اديني! و تقلي انت اديني!

انا عايزة اشرب الحب من قلبك
انا عايزة اشرب الحب من شفايفك

و چو كايرو بيقولها:
طول اليوم كل يوم!
نازلة تحت نازلة تحت!
طول اليوم كل يوم!
اف اح اف اح!
https://www.youtube.com/watch?v=kebrzMXm7RY

بعد كل ده طبعا شرطة الاخلاق منعت الالبوم في مصر. و رغم محاولتها في حذف الاغنيتين و اعادة اصدار الالبوم مقدرتش توصل لقلوب المصريين اللي كانت عايزة تكون واحدة منهم بالقدر اللي تستحقه. الا انها عملت حفلة في مصر في اوائل الالفينات.

الاغنيات المفضلة : (Mon Amie la Rose, Aqaba, Bahlam, Ezzay, Mahlabeya)
8/10
Natacha Atlas - Gedida
1999
اسمع: https://open.spotify.com/album/45EMyiSabDPW0F6YFT7XH1