مش بيغني الكآبة لكن بيغني الصدق | وجيه عزيز - بالليل (1997)

لما نصحوه يعمل حفلات اكتر و يظهر في الاعلام؛ لانه سلعة ولازم يسوقها.
رد الملحن و الفنان وجيه عزيز:
"انا مش بشوف المستمع علي انه زبون عشان هو يشوفني سلعة"


و ده بيدينا انطباع عن صدق الفن اللي بيقدمه واحد من ابلغ فنانين وقته, وجيه عزيز.

بداياته

الفنان و الملحن وجيه عزيز بدأ مشواره عليالمسرح من اواخر التمانينات و كون فرقة موسيقية اسمها اوتار مصرية في بداية التسعينات. و في سنة 1993  لحن لمحمد منير اربع اغاني من شريط اللون و الطول و الحرية: (تعلالي - عصفور - صغير السن - هييه)

في سنة 90 انتج وجيه اول البوماته "لو بإيدي" لكن مش متوفر علي الانترنت، محظوظ اللي معاه نسخة الكاسيت!


هنبتدي بتاني البوم "بالليل" اللي تم انتاجه بدعم و تمويل من صندوف التنمية الثقافية التابع لوزارة الثقافة المصرية عام 1997.

بالليل (1997)

بافتتاحية "مؤقتا" درامز بعديها بايس مع الدف و طبلة، وصوت وجيه بيغني "ياليل" بعديها صولو درامز. كأن كل فرد في الفرقة بيجهز نفسه عشان يقدم افضل ما يمكن تقديمه من إبداع.

زيه زي كتير من فنانين ما بعد الانفتاح، بيجمع الموسيقي الشرقية و الغربية في معادلة جديدة مميزة، عن طريق استخدام جمالية لحنية غربية catchy و توزيع شرقي، و اشرتك موسيقي شغبية و تراثية اوقات.
زي ما سمعنا في "توتة"، الفلوت و التخت عالميلودي المفتاحية و البايس.

لكن عكس موسيقي محمد منير مع slam sound مثلا. مش بينغمس عزيز في الغربي اوي لا يمكن تجاهل الروح المصرية فيها، الشاعرية و الكلمات البسيطة و الشعبية.

زي ما في "بغيب" بيوصف حنينه للحارة, و "ساكتة ليه" بيحاول يفضفض مع بلده ايه اللي مسكتها علي اللي بيجري.

زيادة عن الحس الوطني بتبتدي تظهر ملامح شخصية عزيز موسيقيا، في اغنية الجاز "نفس الاحساس". مع إيمان يونس. بيقف عزيز كابت احاسيسه قدام حبيبته، اللي بتبادل نفس الشعور. و هنفهم اكتر الشخصية دي في الاصدارات الجاية.


بيقع في سِنة و ياخد غفوة يحلم بيها في "بليل" و "علي فكرة" كانت مهمة تلحينية و توزيعية ناجحة و بتوضح شطارة القائمين علي العمل.

كلمات:مجدي نجيب

علي فكرة انا عاشق بكره

انا عاشق افراح مجنونة

بتقطع في الليل و ضفايره

في سكونه و جنونه و خوفه

و تجيب الشمس المكسوفة

وتضوي ع الحلم نشوفه

وبقولك في بداية فرحي

أنا جرحي نسيته مسموح

مسموحلك تتعاتبي ولكن

في ليالي الأحزان ما تعاتبي

دنا ماشي بقلبي المجروح

بيفوق عزيز من احلامه بسرعة ;لأنها عادة مابتطولش. ونسمع تهويدة العود.

كلمات: محمد ناصر علي

شوية هموم بتوع كل يوم

يلفوا في راسي

افر

يطولوني

الالبوم بيجمع طيف من الوان التمانينات و التسعينات, فبعد ما سمعنا الـsophisti-pop في "علي فكرة". بنسمع

الـsynthpop في "معرفش ليه" و اللي اتلحنت و اتوزعت بعبقرية من الموزع هشان نزيه و حركت مشاعري عند مقطع الـflute العبقري مع كلمات معبرة من الشاعر محمد ناصر علي, اللي كتب كل اغاني الالبوم -ما عدا (توتة ,علي فكرة و صحيتني ليه)-.

كلمات: محمد ناصر علي

معرفش ليه

و يمكن لوعرفت انا ماعشقوش

دايما شايلّي كلام

بشعر كأني ماقلتهوش

و زي عادة البومات وجيه عزيز المتخبطة بين الامل و اليأس. بيفوق من عالم الاحلام و الامال الي الواقع في اخر اغنية.

"صحيتني ليه" رغم انها اتلحنت علي مدرسة الطقطوقة الراقصة الا انها بتوجع القلوب من مطلع الاغنية.

كلمات: فؤاد حداد

صحيتني ليه، يا شويش؟

يا شويش، ده انا كنت سارح في الملكوت!

لما بنام بحلم و بعيش، لما بفوق ما بفوقش

بموت

لاحقا مع اصدارات "زعلان شوية" و "ناقص حتة" بيتخلق انطباع عن وجيه انه حزين او كئيب.

يمكن.

لكن يائس ؟ مش ممكن

لأن لون كلماته مش حبا في السواد, لكن احتجاج ضده, ضد الظلم و القمع و الفساد.

في اغنية "ان ماقدرتش تضحك" اللي لحنها و غناها بداله احمد زكي في فيلم هستيريا.

بيتضحلي ان وجيه مش بيغني الكآبة, لكن بيغني الصدق.

وان سألوك الناس عن ضي

جوه عيونك ما بيلمعشي .. متخبيش

قولهم العيب مش فيا

ده العيب في الضي

وانا مش عاشق ضلمة

ولا زعلت الضي

مسير الضي لوحده .. هيلمع

ومسير الضحك لوحده .. هيطلع

مبيجرحش .. ولا يأذيش