ليجسي يصدر "اجزخانة" لإزالة السمّية

سمعت ليجسي ،فنان التراب من طنطا، قبل كدة في "اتنين بليل". كانت اغنية موفقة جدا و عجبني الجو الـrelaxing و صوت السينث التمانيناتي المميز علي اقل بين فنانين التراب في المشهد المصري.

فتي "ابيوسف"

في الـep الاول اللي اصدره في ٢٠١٩، "191-181" واذا استثنينا "اخويا"، مش هنلاحظ فرق بينه و بين فنانين التراب من بقية فنانين المشهد. بالنسبالي اغنية "فتي الشاشة" كنت حاسسها "فتي ابيوسف" و حسيت أنه بيدور علي صوته الشخصي.

لكن السنة دي تميز ليجسي في الـep التاني "اجزخانة" من ٣ تراكات. و بدأ يحدد ملامح شخصية بينفرد بيها عن اي فنان اخر في المشهد.

اجزخانة

اولا: بينفرد ليجيسي بصوت الـlo-fi hip-hop اللي قليلين جدا في السين المصري بيلعبوه زي ما هو لعبه في "روشتة"، و هو لون من الوان الهيب-هوب الـinstrumental اللي بدأت من ٢٠١٠ علي يد المنتج الياباني Nujabes و منتج الهيب هوب الشهير Jdilla و تطورت علي ايدي الـproducers و الـbeatmakers علي الانترنت، بتتميز بجو مُرخي و tempo بطئ و تأثيرات من موسيقي الچاز من حيث بناء و الكوردات و في بعض الاحيان الارتجال زي ما حصل في "روشتة".

ثانيا: التميز و الفرادة دي مش بتكمن بس في لون التمانيناتي او الـdown-tempo ولا في الجو الكئيب الملنخولي لكن بالنسبالي ليجيسي مش مجرد فنان لكن شخصية مميزة بكل ما تحتويه موسيقاه من عناصر، زي الكلمات و الاختيارات الفنية.

ثالثا: بيشارك في السمة دي ابيوسف، و هي انه اوريجينال و بيكتب مزيكا لنفسه و الذاتية في الكتابة واضحة و متجلية. لكن بيختلف في "الاجزخانة" ،كما الاصدار الاول، بآلية التعامل مع الاكتئاب. علي عكس إستسلام ابيوسف للاكتئاب و المشاعر السوداوية في "واحد واحد"، ليجيسي بيرفض استمرار تدفق السموم في عروقه و بيواجه اكتئابه باعتزال ايا كان ما او من يسمّه.

مراجعة البوم "واحد واحد" لابيوسف

اعتزال كل ما يشعره بالسوء و الكرب، كالعلاقات السامة التي لا تجني لصاحبها سوي مزيدا من الاسي و السقم علي المدي الطويل. بيظهر ده في سطور موفقة جدا زي:

البداية بـ"بيتادين" في نقاء صوت, جودة وشطارة ليجيسي الانتاجية، يوصف علاقته السامة مع حبيبته السابقة:

"انتي بتباني و تختفي في لمح البصر

مش قريبه بعيده زي القمر

مفيش بيننا اي طريق مختصر

اتحكمت في كل حاجه الا الغضب

كل اللي قلته فضفضه

كل اللي سمعته كان صدا"

"بخاف انساكي بخاف انساكي بخاف اغيب

انا نسيت نفسي و منستكيش"

اغنية synthpop عادية قريبة من البوب-راب بتاع كانيي ويست في ye مع الجيتار التمانيناتي. ما عدا اللمسة الشرقية اللي ظهرت علي استيحاء في الـfadeout اخر الاغنية، مثيرة للاهتمام!

اهتمامي بيوصل ذروته في واحدة من افضل الاغاني تم اصدارها في ٢٠٢٠ بدون شك "روشتة" مع تون جيتار الچاز المرتجل، و انا فعلا مبسوط ان فنان من المشهد المصري اخيرا قرر يدي الجاز حقه في مزيكته، لان الجاز-هيبهوب -بعيدا عن الlofi- من اكتر الالوان الصاعدة مؤخرا.

"بس مش بزايد يلا بناقص

سحابه و نجوم لفوق باصص"

"ميه ميه كله بونو

جي جي زي tomorrow

بوسع وسع زي الافق

مهما يدورو يلفوا جوا الطرق

لا بلت ولا بعجن

ع الهادي مش مستعجل

ع الصامت انا بعمل

جينا الدنيا نتكعبل"

"فيه مساعده فيه شكراً

فيه وداع مفيش قبله

فيه انهرده مش بكره

مش هتيجي بالأوردر

عايز اسيب حجات تذكر"

"نشتري دماغنا نملكها

ملك ملك مش اجره

قافل قافل الاوكره"

"انا مصدر وش خشب خشب

مع الاندال مفيش ع الدغري

يمكن تحلي بكره تروقلي

و اجر كوكب علي تروللي

هتيجي لحد عندي لو مكتوبلي"

البايس عجبني فشخ في "كمادات" مع السينث المستلهم من الالعاب الـretro، و لاينات ليجيسي الفشيخة عن مظاهر تانية من السموم، زي الفلوس اللي بتيجي بالذل:

"مش عايز اركب Camaro و روحي تبقي ف الدواسة، تحت رجلي"

"الف شكر للاكتئاب، لحد هنا و اركن"

بيرفض استمرار المسيرة مع الاكتئاب اللي البعض بيزامله

علي مدار الـep اعجبت باداء الصوتي لليجيسي الا في الحتة الـhigh-pitched خصوصا في اخر "بتادين"، اللي شخصيا كنت افضل ان يتلعب بيها digitally، يتعمل ديستورشن او يعلي الـpitch بتاع صوته و "هو بيغني بطبيعته"، لاني شخصيا حاسس انه كان بيـscreech!

اصدار حلو في المجمل، بيتميز بكونسبت و جمالية فريدة "مصريا"، اتمني انه يطول علي شكل اصدار LP. و تأشيرة لفنان مصري criminally underrated للوصول للشهرة و المجد عن استحقاق. رغم عيوب الاصدار الا ان باعتباره مشروع فنان واحد عمل كل حاجة لوحده، عظيم!

Lege-Cy - Agzakhana EP (2020)

Trap, Lo-Fi Hip-Hop, Synthpop

3/5