روك من الوحيدين للوحيدين ‏.. ‏كيد ‏داكوتا

"كيد داكوتا" هي مشروع روك من من فرد واحد، و هو دارين جاكسون.

وراء الاشجار الطويلة و الانهار و البحيرات الطبيعية يسكن و بيعمل مزيكته لوحده في بلدة منعزلة اسمها بيسون في ولاية ساوث داكوتا - من اقل الولايات من حيث عدد السكان في الغرب الاوسط.

صيف ٩٩ اصدر مع صاحبه القديم -اللي كان ضيف كدرامر-ep من خمس اغاني ، so pretty. سمع الان سبارهوك عضو من فرقة low، الشهيرة بمزيكتها البطيئة اللي بتتخذ طابع حزين.

عجبه و عرض عليه يعيد اصداره من شركة تسجيلاته بنسخة مطولة lp في سنة ٢٠٠٢.

 ارشحلكم البوم i could live in hope لفرقة low

الالبوم فاجأني باسلوبه الفريد في الايندي من حيث الاداء و الانتاج. صحيح هو متأثر جدا بمشهد الايمو الغرب اوسطي لكن بيتفرد عنهم بالمساحة الواسعة و الطول و الانتاج و الهدوء و الاهم لا بيصرخ و لا يعيط. 

ماسمعتش نفس اداء الجيتار كتير يمكن غير بعدها بعشر سنين من البوم shields لـgrizzly bear. الـslides و الاوتار المكتومة و الmulti-layered vocals.

مجموعة من اغاني مطولة بمساحة واسعة نجحت بشكل نادر تخلق الجو السحيق البارد الوحيد تجلت في الاغنية الاخيرة بطول ١٠ دقايق The Overcoat.

دقيقة من الصمت، لا شئ سوي صوت الرياح الا ان تأتي نغمة لطيفة من الكاليمبا. عن يوم من ايام دارين الباردة الوحيدة المعتادة امام المدفئة و بيقرأ رواية the overcoat. بيفكرني بنفس يوم عيد ميلادي ال١٦ اللي قضيته بقرأ رواية the pearl لجون شتاينبك.

كنت بستغرب الناس اللي بتقول انها هتبتدي تقرأ و تسمع مزيكا استغلالا لوقت الحظر - و بشكل مدهش تعالج اكتئابك ؟!!-

طب تعمل ايه لو كان ده العادي بتاعك ؟!

حاجتين ماقدرتش الاقي زيهم في so pretty:

١) الجو البارد، الوحيد و المظلم، تقدر تقول مزيكا " ضلم الاوضة، مدد علي السرير و اشرب سجارة -لو مابتشربهاش متجربش- و تقعد تفتكر كل اللحظات الي حسستك انك زبالة .. اخيييه.

٢) مستوي الغموض حول الفنان و الاصدار بالنسبة لجودته.

Kid Dakota - So Pretty 

2002

Indie Rock, Midwest Emo

4/5

ابيوسف - ١/١

"الاكتئاب هو مرض العصر"

-ستيفن لاردي

و لو العنف و التمرد هما الثيمتان الغالبتان في هيبهوب الثمانينات، فالاكتئاب هو الثيمة الرئيسة في العقد اللي فات.

من سنة ٢٠١٠ و تم اصدار جرعة من الاكتئاب و كراهية النفس زي Taboo لـDenzel Curry و Blond لـFrank Ocean و Igor لـTyler, the creator. و مع تصدر xxxtentacion و lil peep قايمة الـbillboard اتخذ العقد جو ملنخولي كئيب طوال العام.حتي فنانين الهيب-هوب العرب زي سندباد الورد لشب جديد و ١/١ لابيوسف.

بعضهم حاول يعبر عن معاناته بالسخرية زي Dizze Rascal و Danny brown في Atrocity Exhibition. الفكاهة و السخرية كانت علامة ابيوسف في مشهد الهيبهوب المصري، لكن في ٢٠١٨ مش قادر يشيل في صدره اكتر من كده.

"ده الواقع... حاف مايغركش الإستخفاف"

في البوم ١/١، ابيو بيفتح صدره و يحرر كل مشاعره الحبيسة و الكئيبة بكل امانة و صراحة و صدق.و كلما الصدق زاد كلما السواد ازداد غتمة و اريقت كلماته كئابة.

"هنا مش هتلاقي امل"

"إللي جاي أوحش أكيد "

"جوايا سواد أنا حايشه"

"مستني عزرائيل انا و مستعجل"

"لما بيخلص العسل يتبقي سمهم"

بكرهم كلهم كلهم كلهم"

"كنتي فين لما كنت عايز اموت ؟!"

"انا عايز اموت"

جرعة من كراهية النفس self-hatred، اطلاقه لنفسه نفس اللقب عدة مرات "الواد التلم".

"هنسي اني الواد التلم دوا"

جري العمر اللي بيتسرق زي الهوا

ما كانش المفروض اتولد من الاول"

ابيوسف طول عمره بالنسبالي الحالم المبدع صاحب الصور التجريدية الخيالية، محافظ علي الـrhymes بتاعته زي اللي بيمشوا عالحبل من غير ما يقع, و في نفس الوقت تفتح بقك من روعة الصور.

و ده اللي لفتني ليه و خلاني اعيد وجهة نظري في السين ككل من ساعة ديس تراك "اولويز بالاجنحة" و اغنية "سمير قميص" اللي قلت عنه صورة لنعمة الخيال الواسع و احلام اليقظة.

ده الـManic-depressive illness ذهان الهوس الاكتئابي زي ما بتسميه كاي جاميسون في كتابها "عقل غير هادئ"، او الـbipolar affective disorder اضطراب الثنائي القطبي زي ما يعرف عالميا. الاضطراب ده بيظهر بتجلي في اغنية "فين الدوا".

"قالتلي انت بوشين

قلتلها اه

وبكره الاتنين"

"بلاغي نفسي.. البرشام غير متاح

بقابل في المنام أشباح

الإكتئاب ده كفاح

ماظنش بالكلام برتاح

 غرقان بوجه عام.. سباح

انا متناقض"

"هنسي اني الواد التلم دوا

جري العمر اللي بيتسرق زي الهوا

ما كانش المفروض اتولد من الاول

فين الدوا ؟"

الدواء اللي بيدور عليه ابيو قد يكون "الليثيوم" و هو اشهر دواء بيتاخد عشان يقلل من حالات الهياج اللي بيعاني منها، سعيد و مزقطط شايف الحياة علبة الوان او مكروب و كئيب شايف الدنيا سواد.

امل

"إللي جاي أوحش أكيد فا ماببصش لقدام

أنا ببص تحت رجلي عشان دوست علي ألغام

ده بالضبط إللي أنا عايشه

جوايا سواد أنا حايشه"

امل ٢

"لو دلوقتي كان بها

عن ايامي انا في غنا

انا دماغي انا كدا

مش هتلاقي امل هنا"

كاي جاميسون في كتابها an unquiet mind كانت طول الوقت بتتكلم عن ارتباط الاضطراب ده بفنانين و ادباء عظماء عندهم قدرة ابداعية واسعة، انما ابيو عنده قدرة ابداعية خارقة.

بحترم جرأته و صراحته و قراراته الفنية بالتعاون مع زولي المغامر.

اتمني ان "ابيوسف" يكمل في نفس الطريق الجرئ و المجرب, يكسر حواجزإبداع. و يلهم العديدمن القنانين و الشباب.

لكن في نهاية اليوم

الاخصام: ١

ابيوسف: ٢

بحر ابو جريشة ‏و ‏التحفة ‏الفنية "كفاية ‏بعاد"

بحر ابو جريشة دراسة و حالة فنية تستحق اهتمام و تعمق وكلام وقت كبير. لكن النهاردة هركز علي اول شريط و الاقرب لقلبي "كفاية بعاد".

غريب

من قرية قرشة النوبية لكن مختلف عليه اذا كان اتولد في الاسماعيلية و الاسكندرية، لان اهله اتشتتوا كتير بعد تغريب النوبيين في الخمسينات. نقدر نلاحظ الم بحر بسبب الغربة في اغانيه، زي غريب و طال الطريق و كفاية بعاد و دلال الصحاري. رغم كده اهل اسكندرية اعتبروا ابو جريشة بحر تاني عاموا في مشاعره الفياضةو قوة صوته في اول شريطين كفاية بعاد و مقادير، و لقي بحر مابين اهلها الحب و الدفاء من شتاء الغربة.

"مش عايز فلوس، عايز اغني"

بحر اقل ما يقول عنه فنان شغوف .. الشغف.. هي الحاجة اللي ممكن تدينا فنان زيه، لكن الشغف محتاج جرأة!

اشتغل صول في البحرية و كان بياخدها مشي لحد الافراح اللي بيحييها في باكوس، كان ممكن يكتفي بالافراح اللي بيحييها.. يغني اغاني مألفها او اغاني غيره مش فارقة!

لكنه قرر يألف اغانيه و يجيب فرقة و يدفعلهم من فلوس بيته.و الجرأة لها تمنها. الفلوس خلصت و حصلتله ازمة مادية، و هنا نفهم كتير من شخصية بحر, لما قرر يلجأ لحيلة كل شغوف و يروح لصاحب شركة صوت الدلتا و يسمعه و يعرض عليه ينزل اغانيه،و باللي هو عايزه!

رائد البلوز

صوت بحر الشجي و اسلوب غناه المتحرر خلوه فريد و مختلف بس مش غريب بالنسبه لفنانين البلوز الامريكي زي bb king اللي كان عندهم نفس طبقة الصوت الواطية low-pitched و نفس احساس الغربة في دلتا المسيسيبي و الجنوب الامريكي. فيه تشابهات اعمق بكتير بين البلوز و مزيكا ابو جريشة زي abb lyrical structure حيث بيتم تكرار نفس الجملة مرتين.

صادق

"true blues, lyrics are absolutely true. singing about personal experiences. sometimes good sometimes bad. but they didn't lie"

-jimmy duck holmes

بيشترك مع الامريكان الافارقة اهتمامه بالتعبير عن التجربة الفردية مم احاسيس الحزن و الفرح اللي بيولد صدق المشاعر عند الغناء عن الام الغربة و الوحدة و فرحة الحب و التعلق بالامل، بيغلب علي كلمات بحر الشكوي من الم الغربة، الفرق ان مزيكا بحر بتتمتع بايقاع راقص و الات نفخ اكتر و ده اقرب للموسيقي السواحلية، لكن نلاقي الشبه فاضح بين البلوز بتاع شيكاغو في اغنية يا هاجر من حيث الـtoxic trumpet الات النفخ الحادة.

كفاية بعاد

من اجمل الالبومات المفضلة بالنسبة لأي شخص اوقات بيبقي لأن الفنان بيشارك المستمع نفس الاحاسيس و الافكار و المشاكل يحس باللي بيحس بيه المستمع، في ايام مش هي احسن ايامه. الطابع الحزين لاغاني بحر ممكن تكون اجمل ايد تواسي و تدفي قلب المهموم. بكلمات بسيطة شديدة علي القلب.

كلمات علي عبد الخالق لمسوا قُليبي -باللهجة النوبية- في اغنية طال الطريق اللي كنت بسمعها في وقت ماشفتش صحابي ٣ اشهر.

طال الطريق يا قلبي طال

ولا فيه رفيق و لا طيف خيال

و بديت اسير

زي الاسير

ارحل بعيد من غير حبيب

يا قلبي ليه ؟! امرك عجيب!

دربك طويل تمشيه وحيد

من غربتك و عذاب شديد

و لليل سهران تبكي الهموم

الليل يطول قمرك يغيب

و تعيش حزين بين الدروب

فاتك حبيبك تشكي بالهموم

مهما حصل برضك عنيد

ترضي بالعذاب

بُعد الصحاب

او لما بيخاطب قلبه كأنه بيوجهله نصايح في قلبي العطوف

ياقلبي العطوف

لف الدنيا شوف

لف و شوف حبيبك

من بين الالوف

اخاف لتوه يا قلبي

و تقول الظروف

مشتاق للجنان و الزهرة الندي

حبيب و معاه حبيبه

و احنا امتي هنبتدي ؟

لف و دور تلاقي

حبيب مخلص يحبك

يكون عالعهد باقي

من سحره و جماله

تصقفله الايادي

غير الالحان الجميلة و التوزيع العبقري و شاعرية الكلمات و الصوت غير المتكلف. لكن المميز في شريط كفاية بعاد، علي عكس -الاسطورة بلاشك- احمد منيب و مزيكته المولدة بالكمبيوتر و الـmulti-layerd vocals و ان الالبوم المسجل علي طريقة الtracks، شريط كفاية بعاد اتسجل one-take في ليلة واحدة جمع العازفين و سجلوها في استديوهات صوت الدلتا. مزيكا اكوستيك و اداء حي ١٠٠٪ المزيكا طالعة من القلب من غير ولا لمسة تلاعب بالتكنولوجيا الحديثة و المتوفرة ساعتها.

صوت الدلتا و صاحبها نصيف قزمان اللي يبقي اول واحد ينتج لعمرو دياب، بحر -بطريقة مباشرة او لا- ساعد في غني الاولاني و شهرة التاني، لان اغنية "ماله ماله" بتاعت ابو جريشة كانت في اول شريط لعمرو دياب.

بحر ابو جريشة - ماله ماله

عمرو دياب - ماله ماله

علي كوبانا

رغم لون بشرته و سلمه الخماسي بحر ابو جريشة ما كانش متعصب لهوية واحدة في مزيكته، علي عكس حسن الجزولي او حمزة علاء الدين اللي اكتفوا بالغناء بالايقاعات و اللغة النوبية بس. بفضل فرقة علي كوبان نقدر نسمع في شرايط بحر خصوصا بعد كفاية بعاد، دف نوبي، طبلة، الات نفخ، الات وترية، عود، اكورديون علي مقامات و الوان شرقية مختلفة و جيتار عبقري في اول اغنية كفاية بعاد.

اولي تسجيلات فرقة علي كوبانا "من النوبة الي القاهرة" تحتوي علي اغاني افراح نوبية

فلفل فون.. ايه الاسم ابن المتـ***ة ده ؟!

و انا بكلم صاحب محل سونو ستور في جليم و بسأله علي شرايط لبحر، قالي "والله ما عندي روح اسأل عند فلفل في محطة الرمل" قلتله "فلفل احا ايه الاسم ده؟!", ضحك و قالي "ده اسم الشركة اللي بتبيعهم باين؟".

اكتشفت بعدين لما سألت ان فلفل فون هي اسم شركة التسجيل اللي انتجت لبحر اخر شريطين .. كانوا وحشين فشخ و مش في قيمة ابو جريشة.

علي فين يا قمر ؟!

ده بعادك علمني السهر

القمر بيطلع في الليل في هدوء وسط النجوم، ينشر نوره في الضلمة، يواسينا في الليالي الوحيدة. و زي ما بيطلع بهدوء بيخفت في هدوء. في سنة ١٩٩٥ غاب عنا قمر سابنا نتوه في السكة بس سابلنا اغانيه الجياشة ترافقنا لو تهنا.

"لو فيه سلاسل فضة, من فضلك .. نفضها" | مراجعة البوم ‏YFGYY ‎لابيوسف

 

مشهد هاوي

عشان نفهم تأثير "ابيوسف" -الشخصية الرئيسية للرابر المصري يوسف الطاي- لازم نرجع و نلقي نظرة علي ملامح مشهد الهيب هوب المصري مع بداية العقد الاول من الالفية الثالثة.

و اللي بفضّل اوصفه وقتها بإختصار "مشهد هاوي"، رغم وجود جماهيرية بين الشباب و وجود حفلات منظمة اغلبها مش ربحي او منظم من شركات متخصصة زي دلوقتي، لكنه ظل مشهد كسول و "راكد" بيندر فيه الإبداع و الاختلاف.

معتمدين بشكل اساسي علي المدرسة القديمة من الهيب هوب و الجانجستا راب او «راب العصابات». كل رابر بيهتم بإظهار قوته و فشاخته كلاماتيا و قافيةً علي إيقاع beat بسيط مبني من عينة ومتكرر، اوقات بشك في اصليته: زي ( احمد كامل, دينيو وعفروتو)

علي الجانب التاني رابرز عايزين "يحللوا" المزيكا اللي بيعملوها قدام المجتمع عن طريق تقديم قضايا مش بالضرورة تهم الشاب العربي ؛كدليل انهم بيعملوا فن هادف و توعوي زي: (زاب ثروت و دراجون هِل و الجوكر و اسفلت)

 

عشان كدة توقفت عن سماع الهيب هوب المصري

 

Death Grips المصري ؟!

 

لسة فاكر اول مرة سمعت "نفتالين", كانت اغنية مختلفة تماما. متصورة بإحترافية نسبيا. مافهمتش اي كلمة في الاغنية,لكني ماقدرتش اطلعها من دماغي و عمال اكرر " ابعد السرير عالمنبه.. كانت فاكراني شريف منير ..كانت بتشبه"

 

بعدين سمعت اغنية تانية "مش فاكر كانت ايه" لكن فاكر كويس انها كانت اكثر غرابة وفاكر التعليق اللي قال "death grips مصري!!"

 

الهيب هوب التجريبي  او الهيب هوب التجريدي :

 التجريبية هو الاهتمام بالتجريب موسيقيا وكسر الحواجز الموسيقية و الكلاماتية في موسيقي الهيب هوب.

 التجريدية  بتكون مهتمة اكتر بالكلامات و التحرر من القيود فنية او منطقية.

زي ما saul williams بيتحرر من قيود القافية و الإيقاع  في البوم Amehyst Rockstar.

عامة الاتنين بيقعوا تحت مظلة الهيب هوب البديل Alternative Hip-Hop. و اللي صعدت من منتصف التسعينات مع الإنترنت. قدر يدي الفرصة للجانرا الاكثر جماهيرية انها تبقي اكثر تجريبا و ارتجاليا وصعدت فرق زيdeath grips  وclpng و jpegmafia بالتزامن مع صعود Abyusif.

The Avant-garde of Egyptian Hip-Hop

مفاهيم فنية زي التجريبية و التجريدية هتقدر توصلك لو عندك خلفية بالمدارس الفنية.

لكن للتوضيح, فن تجريبي experimental و اللي اوقات قد يطلق عليه avantgarde  كلمة avantgarde : مصطلح عسكري فرنسي يعني الفارس في الصفوف الاولي الذي يكسر حواجز العدو.

و تبني النقاد هذا المصطلح ليعبر عن الفن اللي بيهتم بالتغيير و كسر الحواجز و القوالب الفنية. و ده بيطبق في الموسيقي و الادب و الرسم.

 

عشان كدة شئ طبيعي ان مزيكا ابيوسف تبان غريبة, لانه عايز يكسر المعتاد و بيتطلع لنتيجة مختلفة تعبر عنه. بيترك العنان لايده انها تكتب اللي عايزة تكتبه. بدون تفكير منطقي و مراجعة و تشغيل للفص الايسر من المخ.

ابيوسف بيحب يقول اللي هوعايزه, و دي نقطة عظيمة. ممكن مرة توفق و ممكن لا.

انا سفينة جوا بسين

فوق السطوح في الفضاء

 

البوم سمايلي فيس و كانت مجموعة من اغاني هيب هوب الساوندكلاود بدائية الجودة و تجريب خام. كابوس من الdistortion و الصخب. بينما المشهد كله معتمد علي الدرامز و الكيك كان ابيوسف بستخدم عينات درامز مختلفة و مبهرة و من الاوائل الي استخدمت الـhi-hats  السريعة. في "هو السمايلي فيس بتاعه شكله كدا"

 

سمعت في انهي تراك مصري bass drumمكتومة غير "بحط عليكوا" اللي بيبتدي بيها ابيوسف البوم yfgyy ؟!

YFGYY 

اللي اصدره ابيوسف في سنة 2016 او زي ما اتحداه واحد من الفانز :

"جالي سؤال على ask.fm بعد ما قولت إني هعمل ألبوم، السؤال كان: هل هتفشل في الألبوم ولا ياما في الجراب يا يوسف؟"

Yama Fel Graab Ya Youssef = Y.F.G.Y.Y 

بندخل رحلة  لواحد من اقوي البومات الهيبهوب المصرية و العربية القوية كلامتيا, متماسكة قافيةً و جريئة صوتيا.

برغم جرعة التجريب لكن كل اغنية بتتشعبط في الودن تحت تأثير سحري الـrhymes القوية.

"انا not available زهقت من الـmulti-syllable

البت طلبتني cinnabon اسبت لازم تحرموا

respect من هناك لهنا هو داقت فجأة

مش بافهم غباء الناس ده مخي فريش أفكاركو فاسدة

معلش إختارتوا الجزمة"

عينات lo-fi متكررة بتفكرني بعينات death grips بينما بيضيف عليها يوسف اللحنية الكاتشي, توليفة بتفكرني بالجو المستقبلي والمخيف لـdanny brown و clpng  و shappaz places

بنلاحظ الصوت المستقبلي ده في تراك "اشك " اللي بينتهي بـecho -قبل ما يـoveruse استخدام الـechoبعدين في البوم "تمام" يتبعها صوت اشبه بالـdrill او الشنيور.-

و تراك "ok" اللي بيقدم فيه شخصية "رعد"  المغرورة و الواثقة من نفسها اللي سبق و قدمها في البوم يحمل اسمه سنة 2013 ومن وقتها قدم شخصيات مختلفة منها هكتور في الاغنية اللي بعدها.

 

"عمري ما كنت اكاديمي

روح اسمع قديمي

فجديدي اللي بتكنيكي

اعمله بمزاجي وملكش دعوة fam

 

و عن تقمص الشخصيات او الـalter egos فهي عادة استخدمها رابرز بهدف تطوير خيالهم الإبداعي و مهارتهم اللغوية عن طريق خلق شخصيات بملامح و صفات مختلفة. 

زيeminem = slim shady و nicki minage = Roman olanski و Tyler, The Creator = Wolf Hale و Tupac = Makaveli وmf doom اللي خلق لنفسه شخصيات مختلفة منها :king giddorah و madvillian

و فنانين تانيين زي mac miller و غيرهم .. 

رغم تعدد و اختلاف شخصيات ابيوسف الا انها ممكن تلخيصها في اربع حالات: (القلق, الاكتئاب, الجرأة و الغرور)

واثق من إبداعه و إختلافه غير مكترث

تمت - الاغنية الاخيرة من yfgyy

"شوية pink floyd  فانز

بعتبرهم boyband”

"لو فيه سلاسل فضة, من فضلك نفضها"

ابيوسف خرج برة صندوق مشهد الراب المصري اللي متكبلة بسلاسل فضة و ذهبية من إرث المدرسة القديمة للهيب هوب و راب العصابات. و في نهاية الرحلة المستقبلية اللي اخدنا فيها ابيوسف لزمنه, سابق كل منافسيه من المشهد المصري.

بالرغم من غياب الجرأة الفنية و التطلع لشكل اكثر إبداعا حاليا في المشهد بوجه عام, لكن بنقدر نلاحظ فضل ابيوسف في واقع المشهد المصري في 2020. لو مكنش في التأثير فيهم مباشرة زي مروان موسي و ابو الانوار, فعلي الاقل في إلهامهم للتأقلم علي الصوت الجديد و النجاة من نيزك الرتابة, بشهادة عفروتو و احمد سانتا وغيرهم.

"خلاص يا شباب

انصراف"

 

 Abyusif - YFGYY (2016)

Experimental Hip-Hop

4/5

 

Ihsahn - After (مراجعة\review)

فوكاليست اشهر فرقة سيمفونيك بلاك ميتال emperor، و من رواد الموجة التانية و تحوله المثير، Ihsahn

من عضو فرقة kvlt لدخول رحلة تجريب و مزج الميتال بالچاز و الالكترونيك عشان يدي نفس الاحساس السيمفونيك, بعد ما ساب فرقته سنة 2001 بسبب ان اعضاء الفرقة samoth, trym كانوا عايزين يقربوا بمزيكتهم ناحية الديث ميتال.

خلي بعض الـmetalheads اللي بيدعوا انهم "kvlt" تعتبره واحد من الموجة الهيبسترية زي فرق (deafheaven, liturgy .. ).

لكن انا شخصيا مباهتمش بالنقاشات النزعية بتاعت الچانراز خصوصا الـkvlt. اهم حاجة المزيكا حلوة ولا لا ؟!

في البوم After

المزج بين الميتال و الچاز و عكس الفرقة النرويجية shining في البوم blackjazz اللي اهتموا technicality اكتر
هنا ihsahn اهتم بالموود المظلم الحزين اللي بيديه الساكس.

البوم "black jazz" للفرقة النرويجية shining تم اصداره عام 2010

في After الـgrowling اقرب للـscreaming مع multi-layered vocals بنغمة catchy فكرني بتحفة mastodon, crack the skye. كان فيه ريفات و guitar work فشيخة في frozen lakes on mars خصوصا مع تون الجيتار الscreeching.




الميتال التقدمي مع الغناء بالصوت النضيف الحالم اللي بيفكرني نوعا ما بـsteven wilson من porcupine tree. و بنفس الجو الملنخولي المظلم بتاع البوم fear of blank planet و خصوصا لما دخلت عناصر الكترونية و الات زي الكيبورد، حسيت كأني بسمع نسخة بلاك ميتال من porcupine tree.

البوم fear of blank planet لفرقة porcupine tree

الا ان الصراحة ihsahn نجح انه يعمل جو اكثر ظلمة من معظم البومات بوركيوبين البوم after خصوصا مع التجريب بالساكس بتعاون من ساكسفونيست shining النرويجية jorgen makenby، اللي عمل جو جنائزي في undercurrent و اعاد استخدام نفس النوتة عشان يقفل بيها الالبوم قفلة عظيمة memorable من اعظم القفلات اللي سمعتها في on the shores.

 Ihsahn - After (2010)

Black Metal

3.5/5