الإذاعة المصرية و عقود من التحجر و الفاشية !

كتب و نشر لاول مرة بتاريخ 26/10/2019

مش قادر اتحمل كمية الكره !! شايف قدامي ملايين بيكرهوا المهرجانات من اشد اعماقهم! .. و انا شايف ان ده ممكن يبقاله ٣ اسباب او بالاحري ٣ مشاكل بيعاني منهم المجتمع المصري:

أ) الطبقية

او النظرة الدونية لشباب جاي من مناطق اقل منه اجتماعيا و ماديا و بيتكلم بطريقة غير اللي نفسه تتكلم بيها

ب) الجمالية الاخلاقية

الشعب المصري مؤمن من داخله بالجمالية الاخلاقية aesthetic moralism.
وده شئ ناس يعتبروه الشرط اللي بيخليهم يسمعوا اغاني لان في حالة عدمه تثبت حرمانية الموسيقي.

"مش كل المواضيع سافلة

بنشرف اي حفلة

مش ذنبي انك ما فهمتش

و عقول الناس مش كاملة"

لكن لحد ما نتكلم عن الجمالية الاخلاقية خلوني الاول اتكلم عن عدو الفن و الحرية في مصر، سور قدام كل مبدع. قيد في ايد كل فنان. رشاش ماكسيم اللي بيقتل احلام الشباب.


نقابة الموسيقيين و الاذاعة المصرية او اي مؤسسة بتدعي الفن و تهمل اهم دوافعه.. الحرية


ناس كتير شايفين ان الحملة علي المهرجانات من قبل النقابة مُستحقة.. بحجة الدفاع عن الرقي و الفن المصري مش مدركين حقيقة انه عنده تاريخ طويل من العداوات و الصراعات مع فنانين كلنا بنحبهم .. اكلمكم عن مين ولا مين..؟!

ضحايا شرطة الفن

عن كره الاذاعة المصرية للفن الشعبي و اضطهاده ليه و ان لولا صناعة الكاسيت كنا هنتحرم من أصوات زي عبد الباسط حمودة و حسن الاسمر ؟!
الاذاعة المصرية كانت مانعة اذاعة اي اغنية لاي مغني شعبي. و كانت بترفضهم حتي قبل الامتحان، الا لما جه حسن الاسمر و ذاعوا اعلان الشريط بس!!

و لا عن تهميش الاذاعة المصرية للفنانين النوبيين و اللي غموض البحر ابو جريشة يعتبر ذنبها .. التهميش طال حتي محمد منير في بدايته من قبل "النقاد النخبويين". لدرجة اتصاله بمحمد الحلو واحد من مطربين الاوبرا و اللي سبق هاجم غناه و قاله: ماتخفوا عني شوية، لو انت من الخلفاء الراشدين اعتبرني بلال يا اخي ؟!"

"عايزك تسمع حاجة لينا

مادتناش فرصة اسألنا

ما انت مش مُنزل من فوق

و معاك مفاتيح الجنة"

ولا عن قرار "الفاشي" بمنع حميد الشاعري لسنين بحجة انه دخيل اجنبي ؛جاي مصر من ليبيا مخصوص عشان يدمر الفن المصري الرفيع. متجاهلين خطواته للتجديد، حتي شهرته بين الشباب؟!





تعرفوا مين "الفاشي" ؟!

هتلر الموسيقي

الفاشي هو النازي حلمي بكر، اللي زي ما حارب كل الفنانين دول. طلع في ٢٠١٣ في برنامج طوني خليفة عشان يهاجم و يعاير اوكا و اورتيجا بجهلهم و يرمي اراءه الطبقية الخرة بانهم لازم يتمنعوا من الغناء بحجة عدم اكمالهم تعليمهم!!! و دلوقتي بيطالب بمنع اقامة حفلات حمو بيكا!!

"لو شوفتوا عم حلمي

قولوله يسيبنا في حالنا

و هنمشيها سلمي

مش بالتهديد و الرهبة

بالمبدأ جنب الرغبة"

حلمي بكر يستحق كل حرف في كلمة نازي ؛فهو بيعيد مماراسات رموزه. خلال الرايخ الثالث ادولف هتلر عين نفسه متذوق فني و قرر انه ينهب ويحرق اعمال من الفن الحديث زي الفن التكعيبي و الدادية باعتباره "فن منحط" وليد القرن العشرين. كفتية ان اقلك ان اعمال فرانز كافكا و هرمان هسه و كارل ماركس اللي بتقروها دلوقتي هم اللي نجوا من ايديهم!
الحلفاء بعدين اسسوا الـmmfa اللي عملت عمليات مخصوص لإنقاذ التحف بحوذة النازيين.

انا شخصيا مش عارف انجاز لحلمي بكر غير انه بيفتخر باكتشافه اصالة و اللي ironically enough اتخانقت معاه و قررت ماتشتغلش معاه تاني بعد ما اتهمها انها بتشد بودرة!

"مالك و مال الموضوع ؟!

و عياط في العين و دموع

في المهرجان و نجومه

عشان اصبح مسموع

في الشارع لينا رسالة

و المهرجان له فروع"

انا قلت ٣ مشاكل مش كده.. اها.. المشكلة التالتة:

ج) مشكلة الشعب المصري و الحرية

الشعب المصري مش فاهم يعني ايه حرية.
الشعب المصري مش حر لانه لسة مش فاهم يعني ايه حرية.. لانه مش معترف حتي بحرية شوية شباب انهم يغنوا!
و مش عارفين يفرقوا ايه اللي من حقهم يعملوه و ايه لا.
فبدل ما يطالب بمنع السماعات العالية الي بتزعج الناس بيطالب بان ماحدش يغني مهرجانات من اصله.



"مش هاخد انا بكلامك
كلمة و قلناها بلساننا
و رسالة جاية اقولها
موضوع لازم يتغني"


ده مش صراع الكلاس المثقف اللي بيحافظ علي الفن المصري ضد سرسجية السلام و الدخيلة.

ده صراع عقول متحجرة ضد شباب عايز يعبر نفسه و عقليته .. و لو كانت منحطة..

"دايما للمهرجان مشتاق

اللعبة في قلب الشارع

و صحيح الناس اذواق

و الحكم للجمهور

يحكم و يكون دواق

و شارعنا احنا قده

و هنكسب السباق"

#يحيا_الفن_المنحط

الكلمات من مهرجان عم حلمي - سعيد مزيكا، توزيع - حريقة، اورج - باسم الجن

يا عم حلمي حلمك علينا

لو شوفتوا عم حلمي

قولوله يسيبنا في حالنا

و هنمشيها سلمي

مش بالتهديد و الرهبة

بالمبدأ جنب الرغبة

عايزك تسمع حاجة لينا

ماتدناش فرصة اسألنا

ما انت مش منزل من فوق

و معاك مفاتيح الجنة

مش هاخد انا بكلامك

كلمة و قلناها بلساننا

و رسالة جاية اقولها

موضوع لازم يتغني

مالك و مال الموضوع ؟!

و عياط في العين و دموع

في المهرجان و نجومه

عشان اصبح مسموع

في الشارع لينا رسالة

و المهرجان له فروع

المهرجان فيه عيال

لكن مش كله شمال

لو كنا صحيح تافهين

ما كان كلامنا اتقال

المهرجان شغال

مش كل المواضيع سافلة

بنشرف اي حفلة

مش ذنبي انك ما فهمتش

و عقول الناس مش كاملة

دايما للمهرجان مشتاق

اللعبة في قلب الشارع

و صحيح الناس اذواق

و الحكم للجمهور

يحكم و يكون دواق

و شارعنا احنا قده

و هنكسب السباق

روك شرقي المتوسط اللي انتصر لفلسطين - فرقة الدراويش

فرقة الدراويش

مجموعة من محبي موسيقا الروك و التراث, اتقابلوا في مدينة باري في ايطاليا, البلد اللي كانت مهد امبراطورية حكمت حوض البحر الابيض المتوسط، جمعت شبان من أنحاء مختلفة من تلك الامبراطورية المندثرة. و اختلاف خلفياتهم خلاهم يدمجوا ثقافاتهم و حكاياتهم متعددة الالسنة لمزيج فريد من نوعية الروك الاثني ethno-rock سموها "روك شرقي المتوسط" Mediterranean rock

ايه علاقة فلسطين و قطاع غزة بالموضوع ؟ 

الحكاية بدأت من مدينة يافا بفلسطين. بعد النكبة الفلسطينية عام 1948, فرت اسرة اسرة من يافا و لجأت الي لبنان, بعدها بـ14 عام, اتولد الابن الثامن في الاسرة, بطل قصتنا نبيل سلامة.

 رغم انه اتولد في طرابلس, لبنان لكن لم يغب وطنه عن باله، اللي ما عاش فيه, خصوصا مع تصنيفه "نازح".

ما وقفش نبيل مسيرة النزوح و سافر الي ايطاليا، مدينة باري عشان يدرس الهندسة،

و في جامعة باري بيقابل شباب من اماكن مختلفة بين ايطاليا و اليونان بتربطهم ببعض حب الموسيقي، و ساعتها في اوائل التسعينات كان لا يزغب في السماء سوي نجم الروك البديل.

روك شرقي المتوسط

فرق زي REM و U2 و Radiohead، كانوا حديث العديد من محبي الموسيقي العالمية، و الصحف و المجلات المهتمة بالموسيقي. معرفتهم و تقديرهم بموسيقاهم التراثية و حبهم للون الشبابي الصاعد، خلاهم يعملوا المزيج المبدع من الات غربية حديثة مع الات بلدانهم اللي بتحتضن البحر. و يجمعوا لغات بلدانهم العذبة في سبيل الفن و الجمال.

العربية, الايطالية, اليونانية و حتي اللاتينية مع الات غربية زي الجيتار من Enzo Leone و فيولا و كلاسيك جيتار من Paolo Mastromarco  و الات تراثية من من بلدان شرقي المتوسط

نبيل سلامة علي البزق bouzouki - اللي بتتلعب في الشام و تركيا و البلقان

Michele Lobaccaro علي الكفتلي Çifteli اللي بتتلعب في البلقان جنوب ووسط اوروبا 

و الـClaves الة ايقاعية لاتينية

 

 

الـClaves الة ايقاعية لاتينية

    

  

Stratos Diamantis علي الدف معروف بأسم البندير في المغرب العربي bendir - بتتلعب قي الشرق الاوسط و شمال افريقيا

و Rocco Draicchio يأخذ بترسانة متنوعة من الالات الايقاعية و الطبول زي الرق و الدربكة و الكونجا و التمبالي

المزيج ده بيستحضر لاذهان الناس عصر الامبراطورية الرومانية، لكن بدل ما توصف الفرقة مزيكتها بالروك الروماني، و يستحضروا الحقبة الامبريالية، قرروا يسموه روك البحر المتوسط. و بكدة ينضفوا فنهم من اثار الدم اللي سال خلال الحقبة دي. و يكون صافي زي صفاء سماء و بحر حوض المتوسط.

اول اصدار - Self-titled Debut

في عام 1993 اصدروا اول و افضل البوم ليهم في رأيي اللي حمل نفس الاسم، 

بدأ الالبوم بالغناء لوطنه، اللي زي الرسول اللي بيحمل رسالة و استني اللحظة اللي صوته فيها يتسمع عشان ينصر اهله و وطنه، و قطاع الغزة المحاصر في اغنية Gaza.

طفوا سواد الليل نور السماء

طفوا نجوم و زادوا الليل وحشة و ظلام

اكن اطفال بلادي بسمتها تضوي

ساوي من عتم الليل وضح النهار

هبت ريح شمالية عالبلاد

غزة نار تنادي عالكفاح

علوها علي الراية يا رجال

سواعد سمر تحطم هالسنان

نار في كل الديار

غزة شعلانة فيها النار

الغناء لغزة و الفلسطينيين في انتصار لقضيتهم, بالاعتراف بيها عن الكيان الغاصب.

بيغلب علي الالبوم طابع مشمس, متألق زي الشمس و نورها اللي بيتلألأ علي صفحات بحرنا الابيض الجميل. 

في اغنية Mediterrano في نغمة جميلة من الاكورديون و الكفتلي و الجيتار بيغني لوكابلو كلمات جميلة مش فاهم معناها بصراحة بس صوتها بيوحي انه بيقول حاجة حلوة و بيشاركه نبيل.

شي غريب

يا صديقي هالحياة

راح تفحر و تبني

عساك يوم تفهم معناه

اغنية In prima luce بتمتلك جو كنسي و لاتيني مثير للاهتمام, في سفر نغمة جميلة و catchy lick من الكلاسيك جيتار.

لكن كلمات نبيل عكس ذلك, بيسترجع ذكرياته المؤلمة و المجبورة علي النزوح و الرحيل و مسلوبة الراحة و الامان.

 

ســــفر الزمــــان   غيـــــر اللــي كـــان

عــــدروب بعيــــدة  بــسمة الايــام

دفـي ربيعي نسيني الاحزان

خدني معاك وديني

لمرفأ الامان

سفر الزمان

غيـــر اللي كــان

عدروب بعيدة بسمة الايام

دنيا كبرت فينا بغمضة من الاجفان

جــــــــــــــرحـــــــت امـــــــانــينـــــا

جــــــــرحــــــــت حـــــــتي الاشــــــــواك

في تونس جينوفا بيستمر الغناء بالعربي لكن مع ايقاع شرقي عربي اسرع و اقوي شوية

الالبوم بيدخل في استعراض موسيقي و الرتم بيبقي اسرع و بنسمع حضور طاغي للالات التراثية و الشرقية خصوصا, في حنين بنسمع interlude موسيقية من البزق و الفلوت و الطبلة في جو حرملكي جدا.

حتي في الاغنية التاسعة Jerusalem كان اداء جيتار الكتريك لموسيقي شرق اوسطية.

و بينتهي الالبوم بـoutro من عشرين ثانية اسمه Intifada انتفاضة تيمنا بالانتفاضة الفلسطينية الاولي اللي دارت في وقت عمل الالبوم و انتهت في نفس عام الاصدار.

ما بعد الدراويش

الفرقة نجحت جدا و لعبوا في اكتر من فعالية منها تبع منظمات زي اليونسكو و غيرها في عدة مدن و دول منها العراق في مهرجان بابل للثقافة و الفنون عام 1993.

و اصدروا بعدها بثلاث اعوام البوم Radiodervish

لكن في سنة 1997 بينفصل اعضاء الفرقة لكن لحسن الحظ لم تنتهي موسيقي البحر و انقسموا الي فرقتين, كون نبيل مع ميشيل لوباكارو فرقة Radiodervish و اعضاء تانيين كونوا فرقة X-Darawish.

دور نبيل اخر لنبيل

الفترة مابين 1998 و 2011 عمل نبيل سلامة كمراسل لقناة الجزيرة عشان ينقل مجريات الامور في الشرق الاوسط من وجهة النظر الاخري المهملة عالميا و هي وجهة النظر العربية.

و من عام 2011 كرس حياته لمشروع اسمه Esperanto – Note di speranza هدفه انشاء عدد من مدارس الموسيقي في الضفة الغربي بفلسطين, و احضر معاه فرقته Radiodervish و عدد من الفنانين الطليان و عمل حفلة هناك.

ايه هو راب السحابة اللي طلعنا ليها موسي سام ؟

موسي سام هو من فنانين الراب الصاعدين اللي بيطيروا بجناحين, جناح الشغف و جناح الابداع. الاسماعيلي الموهوب عنده شغف طول الوقت عشان يقدملنا الصوت الجديد الحالم, في السحابة. The First Egyptian Cloud Rapper.

اتولد في الجيل الصح - Born in the right generation 

موسي سام, اختصارا موسي و بيتكتب Mousv, اتولد سنة 1998 في الاسماعيلية, بدأ يراب و عايش عقد كان الاكثر ابداعا في تاريخ الهيب هوب, بداية من 2010, توفر وسائل بث الموسيقي المستقلة زي ساوند كلاود و باند كامب و 8tracks, سمح ببيئة غايب عنها الـhiphop heads  البيداجوجي pedagouge  و ساب المايك للشباب الصغير للابداع و التجريب و بثها علي السحابة الالكترونية. خصوصا الموسيقي الفردية او الcomputer synthesised و اللي ممكن الشاب يتعلم انتاجها و ينتج مزيكته بنفسه, زي الهيب هوب. 

اللي ادي لخلق سحابة من الاصوات الجديدة, المختلفة و الجريئة زي Death Grips, Clppng, Lil Ugly Mane و XXXtentacion. نظرا لصغر سن الشباب دي خلاهم نوعا ما يبعدوا عن ثيمات الهيب هوب التقليدية و العصاباتية و يعبروا عن همومهم و قلقهم و مشاكلهم النفسية, زيادة عن الpartying و سوء استعمال المخدرات. اشهرهم Yung Lean عضو Sad Boys, و ده اللي خلاهم في كتير من الاوقات يتصنفوا تحت اسم الemo rap, لكن كمان خدت المزيكا دي صوت حالم و سيكاديلي, و نظرا لكل العوامل دي اهلت السحابة دي انها تترقي الي لون فرعي جديد مشتق من الهيب هوب, كونها مزيكا حالمة تخليك تطير و بتلاقيها علي soundcloud, فاتسمت ال Cloud Rap.

OV

في سنة 2018 اصدر موسي الـdebut اول البوم له ميكستايب ov, تم تسجيلها علي فترات مختلفة اخذت طابع الخواطر بيعبر فيه عن كل اللي في عقله من هموم و قلق و مشاكل نفسية. الالبوم ده كان زي مثيله المصري "واحد واحد" هي Getting Off Chest ماكانش فيه مساحة لتقديم صوت instrumental مختلف لكن فقط التعبير عن الهموم, مشاكله مع امه و سوء تعاملها  معاه و اتهامه بمختلف التهم, زي "المثلية الجنسية"!

و جرعة من الغضب و السخط teen angst اللي يخليه اول اصدار emo rap مصري!

الميكستايب حصل علي إشادة من النقاد و المستمعين, "ده للي سمعه". رغم ان الميكستايب ده من اهم و ابرز الاصدارات في تاريخ مشهد الهيب هوب المصري, ظل موسي من المظلومين جماهيريا, لكن ده ما اثرش علي الشغف و الحماسة و الابداع اللي بيتعمل في المطبخ, و زي الاكلة الحلوة بتاخد وقت عالنار عشان تستوي, مع الوقت ريحتها النفاذة بتطلع و تحوم و بتجذب الجمهور, موسي بدأ يجذب الاهتمام و التقدير اللي يستحقه, لحد ما اصدر التحفة الحالمة, سحابة.

السحابة

من السينجلز اللي اصدرها موسي في 2020 و 2021 قدرت اتعرف علي ميوله للcloud rap, ده ظهر في تراك عدوية حاجة حالمة و ليها جو فضائي بيدعمه صورة غبار النجوم علي الcover, احسن استخدام الecho و ال multilayerd vocals ادالي شعور اني في وسط غبار كوني خلفه انفجار نجم او حاجة! 

في يوم 16 من شهر يونيو 2021, اصدر موسف البوم سحابة, بيبدأ بجو حالم و هادئ, كأنه في رحلة الي الفضاء بدون مهمة. 

مع استاكوزا بيبتدي الجو يضلم و الانتاج يبقي اكثر كثافة و زخم, بايس و هاي هيتس و keys بانتاج ترانسي من مهيمن mohaimen في تراك خباثة.  

السحابة من اكتر التراكات الـcatchy تعيشك في كوكب تاني و تقدر تـvisualize الـshooting stars اللي عملها مهيمن بالـsynthesizer.

اغنية تاروت percussion خماسي متأثرة من الموسيقي الافريقية بنسمعه في التراب الامريكي الجنوبي و التراب الافريقي و المغربي, و مسمعتش مصري بيعمله قبل كدة بصراحة.

مع وسواس بيبتدي الالبوم ياخد صوت Yung Leany سمعتها في الالبوم, قللت من الـreverbs في صوت موسي و وضحت صوت موسي. بيختم الالبوم تراك حلو اوي و هو غيوم.

في رأيي مهمين اتقن عمله علي اكمل وجه, عمل البوم instrumentaly حلو بس موسي عمل البوم كلاماتيا مش بنفس مستوي legacy ميكستايب OV. لكنه بلا شك من افضل الاصدارات السنادي.

7/10

عماد عبدالحليم - ليه حظي كده ؟ .. حكاية العندليب الحزين

 

وريث عبدالحليم حافظ

ولد عماد الدين علي سليمان في 16 سبتمبر 1960 و في عمره الثاني عشر غني الطفل عماد في حفل زفاف الطبيب الخاص لعبدالحليم, سمع حليم صوته, ناداه و وعده انه يتبناه ماديا و معنويا في مسيرته الفنية. سافر الطفل الي القاهرة و هناك شرب اسلوب غناء حليم و اصبح لقبه "عماد عبدالحليم".

مسيرته

كانت تشبه ابوه الروحي تجمع الغناء و التمثيل, مثل فيهم مسلسلين الضباب و العندليب الاسمر و الاتنين بيحكوا قصة حليم. بعديها مثل عدة افلام.

عمل 14 البوم منهم اتنين Tribute Albums غني فيها اغاني حليم و الباقي اغانيه الاصلية, اولهم الوان و اخرهم مقسومالي و ابرزهم في رأيي هم يتيم و ليه حظي كدة ؟

ليه حظي كدة ؟

من اشهر و ابرز اعماله و تعتبر الاغنية اللي بتحمل نفس الاسم هي الانجح علي الاطلاق للعندليب الحزين و دي حاجة مستحقة جدا,

فاول حاجة بتميز الالبوم هي المشاعر الجياشة المنتحبة اللي بتطغي علي الالبوم اللي تم اصدارره تحت اسم "ليه..ليه..حظي معاكي كدة" اتنين ليه مش ليه واحدة تخيل !!

و ده متمثل في الكلمات و البسيطة المعبرة, بعيدا عن سفسطة كلمات علي الحجار و عمقه الممل.

بيشغل بال عماد الشاب البسيط سؤال واحد "ليه ؟"

- في ليه حظي كدة ؟

ليـــه .. ؟ ليــه ؟ .. ليــه ؟      في الاحزان تفتكريني ؟

في عز الفرحة تنسيني ؟   و ارسملك ضحكة تبكيني ؟

مش عارف غير اليأس طريق ..  و لا شايف غير الحزن صديق

و لا قادر اهرب من ده  ده ؟

ليه حظي معاكي يا دنيا كدة ؟

 من تلحين محمد علي سليمان اخو عماد عبد الحليم 

و تأليف الشاعر سمير الطائر و هو اخو امل الطائر شاعر نشيد الحزن لعبد الباسط حمودة "انا مش عارفني"

و اللي سأل نفس السؤال المحبَط في ليه حظي كدة سنة 1994 قبل اخوه امل في البوم ضربة معلم 2007.

انا مين ؟ انا مين ؟ 

مش عارف ابقي انا مين ؟

انا جرح و يأس و قلب حزين ؟ 

انا مين ؟ انا مين ؟

الحاجة التانية اللي بتزود الالبوم روعة و جمال هي الجمل اللحنية و التوزيع اللي صحيح ماتختلفش كتير عن جمل بليغ حمدي بجملة تأثيرات حليم علي عماد. الا و ان الكلمات و الالحان و الصوت الجميل عملوا حوار منسجم و شجي.

و انه من اختيار موفق بإضافة الاورج علي مطلع علي عيني مع اللحن البليغي.

علي عيني يا قلبي علي عيني     فايتك لحبايبي علي عيني

انا رايح للامل و ده نصيبي       انا راجع بالعجل طمن حبيبي

و مع اغنية حليمية صرف لسة بدري

لسة بدري لما يدق الحب بابي .. لسة بدري لما قلبي يدوق عذابي

يا هوي سيبني في حالي يا هوي .. يا هوي سيب قلبي خالي يا هوي

سيبني افرح بالليالي .. قبل ما تشغلي بالي

و الليالي تشوف عذابي .. سيبني سيبني سيبني

سيبني سيبني لسة بدري

بعدين يرجع عماد بالنقيض التام و يقول:

عايز اجرب عايز اقرب .. للفرح مرة و الحب مرة

عايز ادوق معني الحياة .. عايز ادوب ماقلش اه

هنا بيظهر الاضطراب الداخلي و الهموم اللي بيعاني منها عماد, عطشه للحب و الفرح و خوفه من الرفض و الهجر و الالم.

و جيرة الاغنية دي مع اغاني عجيب الحب و من غير وجودك نعرف ان الهم اللي بيؤرق عماد علي طول الالبوم الحب و علاقته بالفرح و بالقلق و الحزن.

ليه ؟

في رأيي حياة عبدالحليم بتعترضها العديد من "ليه ؟" اللي لازم ترفع

ليه ماستقبلش الشهرة اللي يستحقها او علي الاقل اكتر مما حققها شوية ؟

صحيح هو ماكانش بنفس الموهبة الصوتية اللي تخله تنافس او يتحط في مقارنة مع حليم الاب, فالوارث لن يكون بنفس ثروة المورث ولكن من الجدير بالذكر ان وريث حليم كان يعاني من الشائعات وحسب موسوعى ويكيبديا:

ولكن الإشاعات التي حاصرت عماد وآذته كثيراً أثّرت على ثقة عماد في نفسه للأسف وجعلته يخاف من مواجهة الجمهور ويبدو أن مروّجي هذه الإشاعات كان لهم مصلحة في إيذاء عماد ومحاولة القضاء عليه فنياً.

وان كمان وفاة المورث العندليب الاسمر اثر سلبي كبير جدا علي عماد اللي بتقول الصحافة انه شعر بالعزلة و الوحدة و الاكتئاب

ليه النهاية المبكرة دي ؟

يوم 20 اكتوبر 1995 صدم محبي العندليب الحزين خبر وفاته, و اللي طلعت عنها شائعات انه وجدت جثته في شارع البحر الاعظم علي اثر جرعة هروين زائدة ده اللي نفاه بعدين اخوه و قال انه اتوفي اثر مشاكل في القلب.

ايا كانت دي حقيقة او لا مفيش شك اننا خسرنا عطاء فنان موهوب ولكن اثره و فنه لسة موجودين و النهاردة

احنا بنكرم الفنان العظيم ده علي فنه المعبر عنا.

شكرا عماد عبد الحليم

4 اسباب تخلي "ويجز كي ار" من افضل الرابرز في الوطن العربي

١) خلق لغته المميزة

بين البلطجة اللغوية لكردي و MC Amin و بينما يحلق ابيوسف في مخيلته الابداعية. ويجز توصل لـlyrical approach مختلفة، بل خلق لنفسه لغة مميزة. لغة صايعة و شوارعية مابتهددش باكتر ما تقدر تعمله، مش مبالغة ،صادقة مش متكلفة. بنشوفها في "كدا كدا" و "بالسلامة"، melancholic و كئيبة اوقات, بدون تطرف او سوداوية في "ساليني" و "سكرتي". فخور بانتمائه لاسكندرية "سور الميناء" مش باسلوب مزعج زي باتيستوتا ..

من النقط اللي تضاف له انه مش بيفرط من راب "انا ب.. زي الـ.."، ويجز قدر ينفد بجلده من "الزيزية" لكن لسة فيه رابرز ممكن يحشوا التراك كله بالاسلوب المبتذل اللي بيوحيلي بقلة الحيلة الفنية.

 كما ان ويجز بالنسبة لـtrap artists تانيين هو اثري كلماتيا، و هو من الـlyricists المفضلين بالنسبالي.

٢) موهبة صوتية و تحكمات فريدة

ويجز وُهب بقدرة و موهبة صوتية ميزته بين كل المشهد المصري و العربي، من اول دقايق من "تي ان تي" لحد "اسياد البلد" مابيتأخرش انه يبهر جمهوره بتحكماته بصوته المذهلة. بينطلق من ٠ لـ١٠٠، مستغلا طبقة صوته الـhigh-pitched اللي ساعدته يخوض في عدة sub-genres زي ماسمعنا في جزيرة البطل.

٣) جزيرة البطل

كانت الـturnover بالنسبالي، شهادة علي موهبة و جدية ويجز .. فنان مش مجرد one hit wonder. 

و كانت "علي راحتي" و عبقرية دي چي توتي خلق مسار بسيط من snare drum, keyboard loop ؛ عشان ينطلق فيه ويجز بسرعة schumacher و يظهر موهبته الكلامية المثقولة في flow no one can resists. اظهر في التراك -اللي بعتبره من اعظم تراكات الهيبهوب اللي اتعملت في المشهد علي الاطلاق- شخصيته المميزة كما في "الزار" عن طريق اللغة اللي اتكلمنا عليه. و جرب الوان تانية و رام قصر طوله و قلة الخيارات المتاحة الا انه سمعنا فيه (هيبهوب، تراب و الr&b) من ضمن ep كان من افضل الاصدارات السنة اللي فاتت. 2019

٤) بيجرب اصوات كتيرة

و ده السبب ويجز عامل زي القبطان النشيط اللي مابيقدرش يستقر في جزيرة واحدة لوقت طويل، طول الوقت بيجرب اصوات مختلفة و تعاونات مع فنانين و منتجين مختلفين. ده اللي خلي عنده طيف من التراكات، اكتر "نسبيا"، متنوعة و eclectic في الاصوات و الالوان. من اول شكل مزيج للتراب-مهرجان في خربان مع السادات العالمي، الانتاج الـdecent و الـhigh-hats و الدرامز بتاعت dj totti، مزج التراب مع مهرجان ابو تلاتات في اللقطة انتاج وزة منتصر، الصوت الـfuturistic بتاع مولوتوف في بالسلامة، صوت الروك و الالكتريك جيتار في "واحد و عشرين" مقتديا بـKid Cudi و اخيرا اول و انجح تعاون مصري جزائري في اسياد البلد مع SavagePlug.

كل تلك الاسباب مع تلك الـeclecticity تجعل من ويجز اسم فريد في المشهد المصري و دي البداية بس؛ حتي الان يبدو ان ويجز في رحلة صبورة لايجاد صوته المميز انتاجيا، اللي يخليه مش بس فريد بين المشهد السكندري او الدلتا و لكن مميز بين القارات.

و انا مش شايف غير انه محتاج محتاج يخفف singles و يركز علي العلامة المؤثرة بين نفوس اولاد جيله، الmagnum opus، الرمز اللي يخلد اسمه بين الفنانين عالساحة حاليا و اللي لسة هيظهروا ؛تعمل قفزة في عمليتهم الفنية و الـapproach بتاعتهم.

و لحد اللحظة دي ما تيجي .. خمسة علينا